چنگیری کے ہنر نے بدل دی میو خواتین کی زندگی

اسمینہ (۴۸) اپنی ساتھی زبیدہ کے ساتھ ہنستے ہوئے ان دنوں کو یاد کرتی ہیں جب انہوں نے اپنی ماؤں کے ذریعہ پھینکی گئی گندم کی تیلیوں سے چھوٹی ٹوکریاں تیار کی تھیں۔ میوات علاقہ کی زیادہ تر لڑکیوں کی طرح انہوں نے بُنائی کا ہنر اپنی ماؤں کے اصرار پر سیکھا تھا، مگر یہ ان کے خواب و خیال میں بھی نہیں تھا کہ یہی ہنر ایک دن ان کے لیے روزی روٹی کا ذریعہ بن جائے گا۔

اسمینہ ہنستے ہوئے کہتی ہیں، ’’ہم انہیں بناتے تھے اور اپنے رشتہ داروں کو مفت میں دے دیا کرتے تھے۔ اب جب بِکن لاگےی تو ہم نا دیویں فری میں [اب جب بکنے لگی ہیں تو ہم انہیں مفت میں نہیں دیتے]۔‘‘

ہریانہ کے نوح ضلع کے گھاسیڑا گاؤں میں اپنے گھر کے صحن میں سیمنٹ کے بینچ پر بیٹھی، وہ دیسی گیہوں کی ہاتھ بھر لمبی تیلی نکالتی ہیں اور ایک باریک سوئی کا استعمال کرتے ہوئے اسے پانچ حصوں میں تقسیم کرتی ہیں۔ پھر ایک پٹی کا انتخاب کرتے ہوئے، وہ بڑی جتن سے اسے اپنی چنگیری (کم گہرائی والی ڈلیا) کی بڑھتی ہوئی گولائی میں بُن دیتی ہیں۔

اسمینہ کہتی ہیں، ’’اگر گھر میں مہمان آگو اور چنگیری میں روٹی دھر کے نا دی، تو یو کیں گے کہ اسمینہ نے پلیٹ میں روٹی دھر کے دی، چنگیری میں نا دی [اگر گھر میں مہمان آ گئے اور میں نے چنگیری میں روٹیاں نہ دیں، تو وہ شکایت کریں گے کہ روٹیاں پلیٹ میں دی، چنگیری میں نہیں دی]۔‘‘

چنگیری کثیر المقاصد ڈلیا ہوتی ہے، جنہیں ہریانہ اور راجستھان کے میوات علاقہ کی خواتین روایتی طور پر بُنتی ہیں۔ ایک وقت تھا جب یہ چنگیریاں شادی کی تقریبات، عید اور دیگر تہواروں کے موقعوں پر دیے جانے والے تحائف کی روایت کا حصہ تھیں۔

لڑکیوں کے لیے چنگیری بنانے کا ہنر ان کی زندگی کا لازمی حصہ تھی، جس پر شادی کے مذاکرات کے دوران اکثر تبادلہ خیال کیا جاتا تھا۔ اسمینہ کہتی ہیں، ’’لڑکی والے اس بات پر فخر کرتے تھے کہ ان کی بیٹی اتنی چتِرا [ہنرمند] ہے کہ وہ کسی بھی قسم کی چنگیری، گدڑی، یا چولہا بنا سکتی ہے۔‘‘

عورتیں دوپہر کے وقت کسی نہ کسی گھر کے صحن میں اکٹھے ہو کر گپ شپ کرتیں اور بنائی کرتیں۔ ’’ایک عورت درمیان میں بیٹھ کر اپنی نامکمل چنگیری پر کام کرتی تھی اور باقی دوسری عورتیں اس کے ارد گرد بیٹھ کر اس کے نمونوں کو دیکھتی تھیں اور اپنی ٹوکریوں پر اس کی نقل اتارنے کی کوشش کرتی تھیں،‘‘ وہ یاد کرتی ہیں۔

ان کی چھوٹی بیٹیاں بھی وہیں آس پاس کھیلتے کھیلتے یہ ہنر سیکھ جاتی تھیں۔

حالانکہ، اب یہ ماضی کی باتیں ہو گئی ہیں۔ خواتین پہلے کی طرح ہر دوپہر کو ایک دوسرے کے گھروں میں جمع نہیں ہوتیں، اور لڑکیوں کو بنائی کرنا پسند نہیں ہے۔ نہ تو اسمینہ کی لڑکیوں نے اور نہ ہی زبیدہ کی بیٹیوں نے اس ہنر کو سیکھا ہے۔ ’’وہ کہتی ہیں کہ ہمیں چنگیری کی ضرورت نہیں ہے۔ روٹیاں رکھنے کے لیے دوسرے برتن موجود ہیں۔ وہ پوچھتی ہیں کہ ’اگر چنگیری ہی بنانی تھی، تو ہم نے تعلیم کیوں حاصل کی؟‘‘‘ اسمینہ کہتی ہیں۔ ’’وہ مجھ سے کہتی ہیں، ’ہماری آزاد عمر ہے۔‘‘‘

اسمینہ اب یہ ٹوکریاں ریاست ہریانہ دیہی روزگار مشن کے تحت ’برکت‘ نامی ۱۲ خواتین کے سیلف ہیلپ گروپ کے ساتھ مل کر بناتی ہیں۔ وہ اس گروپ کی صدر کے طور پر کام کرتی ہیں۔ نوح ضلع میں اس نوع کے۲۰۰۰ سیلف ہیلپ گروپ ہیں۔

قومی راجدھانی خطہ کا حصہ ہونے کے باوجود، نوح کو ملک کے سب سے پسماندہ ضلع کے طور پر نشان زد کیا گیا ہے (نیتی آیوگ ۲۰۱۸)۔

زبیدہ (۵۲) اسمینہ کی دور کی رشتہ دار ہیں۔ سال ۲۰۱۴ میں اسمینہ نے زبیدہ اور اپنی بھابی کے ساتھ مل کر چنگیری فروخت کرنا شروع کیا تھا۔ یہ خواتین گدڑی اور پردوں کے لیے جھالر بھی بناتی ہیں۔

ایک چنگیری کی قیمت ۱۰۰۰ سے ۱۵۰۰ روپے کے درمیان ہوتی ہے۔ اگر روزانہ چار گھنٹے کام کریں تو اسے مکمل ہونے میں ۱۰ سے ۱۲ دن لگتے ہیں۔ اس کے آرڈر بنیادی طور پر دہلی اور ممبئی سے آتے ہیں، جس میں دیہی روزگار مشن کا تعاون شامل ہے۔

کچھ سال پہلے ایک حادثہ کے بعد اسمینہ کے شوہر عبدل نے کام کرنا چھوڑ دیا تھا۔ تب سے اسمینہ اپنی فیملی کی واحد کمانے والی رکن ہیں اور ہر مہینے آمدنی ۷۰۰۰ سے ۱۰ ہزار روپے تک کما لیتی ہیں۔

یہ ٹوکریاں ہر قسم کے گندم کی تیلیوں سے نہیں بنتی ہیں۔ اسمینہ کہتی ہیں، ’’ہم ایک مخصوص قسم کا گندم استعمال کرتے ہیں، جسے نمبر ۳۰۶ یا دیسی گندم کہا جاتا ہے۔ اس قسم کے گندم کو بغیر کھاد کے کم آبپاشی پر اگایا جاتا ہے۔‘‘ لیکن اب صحیح تیلیوں کی تلاش مشکل ہوتی جا رہی ہے، کیونکہ زیادہ تر کسان کھاد اور حشرہ کش کا استعمال کرنے لگے ہیں۔ اس سے تیلیاں کمزور اور ہلکی ہو جاتی ہیں، جو بنائی کے کام نہیں آتیں۔

جیٹھ اور بیساکھ (مارچ اور اپریل) کے دوران، گندم کی تیلیوں کو خرید کر گھر میں جمع کیا جاتا ہے۔ مانسون کی آمد کے بعد تیلوں کو شوخ رنگوں میں رنگا جاتا ہے – سرخ، زرد، سبز اور گلابی سب سے زیادہ مقبول رنگ ہیں – اور انہیں ہلکی دھوپ میں خشک ہونے کے لیے چھوڑ دیا جاتا ہے۔

نمبر ۳۰۶ ایک اعلیٰ قسم کا مقامی گندم ہے۔ تقریباً آدھے ایکڑ کھیت سے ملنے والی اس کی تیلیوں کی قیمت تقریباً ۱۵ ہزار روپے ہوتی ہے اور اس سے تقریباً ۱۰۰۰ چنگیری بنائی جا سکتی ہے۔

اسمینہ کہتی ہیں، ’’چوماسی کے دنن میں بنائیں گے تو ہمارے ہاتھ نا چیرنگے [اگر ہم انہیں مانسون کے دنوں میں بنائیں گے تو ہمارے ہاتھ نہیں کٹیں گے]۔‘‘ مانسون میں تنکے نرم ہو جاتے ہیں اور انہیں گھمانا اور بُننا آسان ہو جاتاہے۔ دوسرے موسموں میں تیلیاں خشک اور دھاردار ہو سکتی ہیں۔

جب پاری نے اس گروپ سے ملاقات کی تو انہیں آسٹریلیا سے ۲۰۰ چنگیریوں کا آرڈر ملا تھا، لیکن ان کے پاس گندم کے ضروری تنکے نہیں تھے۔ اسمینہ کہتی ہیں، ’’ہمیں جن تیلیوں کی ضرورت ہے اب اس کی کمی ہو گئی ہے، کیونکہ بہت زیادہ بارش کی وجہ سے فصل تباہ ہو گئی تھی۔‘‘

چنگیری کی بنائی میں، دو اہم قسم کے ٹانکے لگتے ہیں، ایک چیروا اور دوسرا آٹن۔ چیروا میں، گندم کی تیلیوں کو متعدد حصوں میں تقسیم کیا جاتا ہے، جس سے کناروں پر ایک پیچیدہ اور مضبوطی سے جڑا ہوا نمونہ بنتا ہے۔ آٹن میں، تنکے کو چپٹا کیا جاتا ہے، جس سے بنائی کو ایک چوڑی اور زیادہ واضح شکل ملتی ہے۔ اسے اکثر بنیاد کے لیے استعمال کیا جاتا ہے۔

’’بہت نہنو ]باریک] کام ہے،‘‘ زبیدہ کہتی ہیں۔

یہ ڈیزائن آس پاس کے ماحول سے حاصل کیے جاتے ہیں، جن کی جڑیں روزمرہ کی چیزوں، مقامی پودوں، پھولوں، اور یہاں تک کہ سونے کی ہنسلی جو میواتی خواتین پہنتی ہیں میں پیوست ہوتی ہیں۔ ٹوکری کے اوپر کھجور، لہر اور پان کے پتوں کے نمونے عام ہیں۔ اس کی بنیاد میں اکثر پھرکی (پہیہ)، رائی کا پھول اور دل جیسے نمونے بنائے جاتے ہیں۔ خاص مواقع کے لیے، مالکان کے نام بھی بُنے جا سکتے ہیں۔

اسمینہ نے ایک بار ایسی چنگیری بنائی جس کے کناروں پر یہ تحریر تھی، ’’ایک روٹی کھائے، دوسری پہ ہاتھ نہ لگائے، اور دھاپ کے کھائے [صرف ایک روٹی کھاؤ، دوسری کو ہاتھ مت لگاؤ، پھر بھی پیٹ بھرا ہو]۔‘‘ یہ اس علاقہ کی ایک عام کہاوت ہے۔

وہ ہنستے ہوئے کہتی ہیں، ’’ہم ہر طرح کی کلاکاری [فنکاری] کرتے ہیں۔‘‘

’’ہر گھماؤ پر ہمیں گننا پڑتا ہے کہ کس رنگ کے کتنے ٹانکے لگے ہیں۔ جیسے سبز رنگ کے پھول میں ایک گھماؤ پر پانچ ٹانکے ہوں گے اور اگلے میں چار۔ یہ سب یاد رکھنا پڑتا ہے، ورنہ پورا ڈیزائن بگڑ جائے گا،‘‘ اسمینہ مزید کہتی ہیں۔

زبیدہ اپنی بیٹی کی شادی کے لیے سنبھال کر رکھی ہوئی چنگیری دکھاتی ہیں، جس میں سات قسم کے پھولوں کے ڈیزائن بنے ہیں۔

لیکن اب باریک اور پیچیدہ ڈیزائن کم ہوتے جا رہے ہیں۔ وہ افسوس کے ساتھ کہتی ہیں، ’’اب سیکھ [تیلی] ہی نا رہی تو چنگیری تو ختم ہوں گی۔‘‘

راجستھان کے الور ضلع میں واقع ٹپوکڑا میں پرورش پانے والی اسمینہ چنگیری نہیں بنانا چاہتی تھیں۔ وہ اپنی والدہ مریم سے کہا کرتی تھیں کہ وہ اپنے سسرال وہی ٹوکریاں لے جائیں گی جنہیں ان کی ماں مریم نے بنائی ہوں! لیکن شادی کے بعد انہیں احساس ہوا کہ یہ ایک ایسی روایت ہے جس سے وہ روگردانی نہیں سکتیں، کیونکہ ان کی ساس کپوری بھی اسی لگن اور جذبے کے ساتھ اس فن سے وابستہ تھیں۔

اسمینہ یاد کرتے ہوئے کہتی ہیں، ’’جب میں یہاں [نوح] آئی تو ہمارے گھر اور محلے کی سبھی عورتیں چنگیری بناتی تھیں، اس لیے میں نے شکست تسلیم کر لی۔‘‘

ہندو اور مسلم دونوں خواتین اس ہنر سے وابستہ تھیں۔ تاہم، وقت گزرنے کے ساتھ اس کو بنیادی طور پر مسلم خواتین نے آگے بڑھایا۔ ’’صرف عمر رسیدہ ہندو خواتین ہی اس ہنر کو جانتی ہوں گی،‘‘ اسمینہ اندازہ لگاتی ہیں۔ ’’ہندو خاندان تعلیم یافتہ ہو گئے اور اس ہنر سے دور ہو گئے۔‘‘

نوح کی اکثریت میو مسلمانوں پر مشتمل ہے، جنہوں نے تاریخی طور پر ہندو ثقافتی رسوم کو اسلامی عقیدہ کے ساتھ ہم آہنگ کر رکھا ہے۔

اسمینہ کے سات بچے ہیں، جن میں تین بیٹیاں اور چار بیٹے ہیں۔ ایک دہائی قبل، ان کی بڑی بیٹی کی شادی ۱۸ سال کی عمر میں ہوئی تھی۔ ’’لیکن اب میں تعلیم کی اہمیت کو سمجھتی ہوں،‘‘ وہ کہتی ہیں۔ ان کی دوسری بیٹی نے گریجویشن مکمل کر لی ہے، جب کہ سب سے چھوٹی ۱۱ویں جماعت میں ہے اور فٹ بال کھیلتی ہے۔

اسمینہ فخر سے کہتی ہیں، ’’وہ فی الحال ایک ٹورنامنٹ میں شرکت کے لیے روہتک میں ہے۔‘‘ ان کی بیٹی کا خواب پولیس افسر یا فٹ بال کوچ بننے کا ہے۔ ’’یہاں اب لوگوں کی ذہنیت بدل رہی ہے۔ اب وہ چاہتے ہیں کہ ان کے بچے تعلیم حاصل کریں،‘‘ وہ کہتی ہیں۔

پڑوسیوں اور رشتہ داروں کی تنقید کو نظر انداز کرتے ہوئے اپنا کام شروع کر کے اسمینہ نے بھی ذہنیت کی اس تبدیلی میں اپنا کردار ادا کیا ہے۔ انہوں نے حکام سے درخواست کی کہ گاؤں میں موجود لڑکیوں کے واحد اسکول کو درجہ ۱۲ تک اپ گریڈ کر دیا جائے۔ آج تقریباً ۱۰۰ لڑکیاں وہاں تعلیم حاصل کر رہی ہیں۔

وہ یاد کرتے ہوئے کہتی ہیں، ’’یہاں بچے بلاوجہ گھومتے رہتے تھے۔ زبیدہ، میں اور کچھ دوسری خواتین نے گھر گھر جا کر والدین کو اس بات پر راضی کیا کہ وہ انہیں سرکاری اسکول میں داخل کرائیں۔ اس سال تقریباً ۷۰ بچوں نے اسکول جانا شروع کیا، اور ان میں سے بہت سے آج برسر روزگار ہیں۔‘‘

اسمینہ خود کبھی اسکول نہیں گئیں، لیکن اس وقت ان کا چہرہ خوشی سے چمک اٹھتا ہے، جب سیلف ہیلپ گروپ کے توسط سے ملنے والے افسران انہیں پڑھا لکھا سمجھتے ہیں۔ انہیں جو پہچان اور عزت ملی ہے، جس میں برکت (تنظیم) کی جانب سے مختلف نمائشوں اور میلوں میں شرکت کے دوران وزیر اعظم اور وزیر اعلیٰ سے ملاقاتیں بھی شامل ہیں، ان کے لیے ایک بہت بڑے اعزاز اور فخر کی بات ہے۔

وہ کہتی ہیں، ’’لال بتی والی گاڑیاں میرے گھر پر رکتی ہیں اور پورا گاؤں فخر محسوس کرتا ہے۔ یہاں تک کہ گاؤں کے پڑھے لکھے لوگ بھی اب ہمارے کام کا حصہ بننا چاہتے ہیں۔ پہلے وہ کہا کرتے تھے کہ عورتوں کا باہر نکلنا گناہ ہے۔‘‘

ان میں سے کچھ بھی ممکن نہیں ہوتا اگر اسمینہ نے چنگیری بنانے کا فن اپنی والدہ سے نہ سیکھا ہوتا۔ لیکن وہ اور زبیدہ دونوں اکثر سوچتے ہیں کہ کیا یہ دستکاری زندہ رہے گی۔ ’’نوعمر لڑکیاں چنگیری کو اپنی ماؤں کی طرف سے ملنے والی ایک نشانی کے طور پر رکھنا چاہتی ہیں،‘‘ وہ ایک زبان ہو کر بولتی ہیں۔ ’’اور ایک دن، بس یہی باقی رہ جائے گا۔‘‘

یہ اسٹوری مرنالنی مکھرجی فاؤنڈیشن (ایم ایم ایف) کی ایک فیلوشپ کے تحت لکھی گئی ہے۔